AMROអះអាងថាសេដ្ឋកិច្ចកម្ពុជានឹងស្ទុះងើបឡើងវិញរង្វង់៤,៧ភាគរយនៅឆ្នាំនេះ
ភ្នំពេញៈ ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន (AMRO) បានព្យាករកាលថ្ងៃទី៣១ ខែមីនា ឆ្នាំ២០២១ថា សេដ្ឋកិច្ចកម្ពុជានឹងរើបឡើងវិញនៅឆ្នាំនេះ បើទោះបីជាវិបត្តិកូវីដ១៩ មិនទាន់ត្រូវបានបញ្ចប់ក៏ដោយ។
យោងតាមរបាយការណ៍ស្តីពី ស្ថានភាពរួមនៃចក្ខុវិស័យកំណើនសេដ្ឋកិច្ច របស់ប្រជាជាតិអាស៊ាន+៣ នៃការិយាល័យAMROបានឱ្យដឹងថា សេដ្ឋកិច្ចកម្ពុជានឹងមានកំនើនឡើងវិញ ក្នុងវង្វង់៤,៧ភាគរយ នៅឆ្នាំ២០២១នេះ ហើយនឹងបន្តកើនឡើងដល់៦,១ភាគរយនៅឆ្នាំក្រោយ។
ការិយាល័យAMRO ក៏បានព្យាករដែរថា សេដ្ឋកិច្ចអាស៊ាន នឹងមានកំណើនងើបឡើងវិញ៤,៩ភាគរយនៅឆ្នាំ២០២១នេះ ហើយនឹងបន្តកើនឡើងដល់៥,៧ភាគរយនៅឆ្នាំក្រោយ។
ប្រធានសេដ្ឋវិទូ AMRO លោក Hoe Ee Khor មានប្រសាសន៍ថា “រដ្ឋាភិបាលមានបទពិសោធន៍ច្រើន ក្នុងការដោះស្រាយការរីករាលដាលនៃជំងឺរាតត្បាត ហើយវិធានការ ដែលមានប្រសិទ្ធិភាព នឹងជួយឱ្យសេដ្ឋកិច្ចមានសកម្មភាព”។
ជាមួយគ្នានេះដែរ របាយការណ៍បច្ចុប្បន្នភាពសេដ្ឋកិច្ច ចុងក្រោយរបស់ធនាគារពិភព (World Bank) ក៏បានឱ្យដឹងដែរថា សកម្មភាពសេដ្ឋកិច្ចកម្ពុជានឹងកម្រើកឡើងវិញនៅឆ្នាំនេះ និងឆ្នាំក្រោយ។
សេដ្ឋកិច្ចកម្ពុជាត្រូវបានព្យាករថា នឹងមានកំណើនឡើងវិញក្នុងរង្វង់៤ភាគរយក្នុងឆ្នាំ២០២១នេះ ហើយនឹងបន្តរីកលូតលាស់បានប្រមាណ៥,២ភាគរយ ក្នុងឆ្នាំ២០២២។ នេះបើយោងតាមរបាយការណ៍បច្ចុប្បន្នភាពសេដ្ឋកិច្ចចុងក្រោយ សម្រាប់តំបន់អាស៊ីបូព៌ានិងប៉ាស៊ីហ្វ៊ិក របស់ធនាគារពិភពចេញផ្សាយនៅថ្ងៃទី២៦ ខែមីនា ឆ្នាំ២០២១៕
Search Cambodia’s Real Estate Portal
Use the search box above to search home listings anywhere in Cambodia.
